मुंबई : संपूर्ण महाराष्ट्रात सीएम चषक स्पर्धांना उत्स्फूर्त प्रतिसाद मिळत असताना मुख्यमंत्री देवेंद्र फडणवीस यांच्या पत्नी अमृता यांनीही सीएम चषक स्पर्धेत भाग घेतला. १५ डिसेंबर २०१८ रोजी मुंबईतील खेतवाडी येथील भगिनी सभागृहात सीएम चषक स्पर्धेच्या उद्घाटनप्रसंगी स्वतः हातात बॅडमिंटन रॅकेट घेत मैदानात उतरल्या आणि उपस्थित महिला खेळाडूंमध्ये उत्साह भरला. या स्पर्धेला गृहिणी आणि तरुणींचा मोठा प्रतिसाद लाभला.
या वेळी मलबार हिल विधानसभा मतदारसंघाचे आमदार मंगलप्रभात लोढा, गिरगावच्या नगरसेविका अनुराधा पोतदार-झवेरी, वाळकेश्वरच्या नगरसेविका ज्योत्स्नाबेन मेहता, ताडदेवच्या नगरसेविका सरिता पाटील, मलबार हिल भारतीय जनता पक्ष अध्यक्षा श्वेता मांजरेकर यांसह भाजप तसेच भारतीय जनता युवा मोर्चाचे (भाजयुमो) प्रमुख कार्यकर्ते उपस्थित होते.
मलबार हिल विधानसभा मतदारसंघातील महिलांनी काढलेल्या आकर्षक आणि भव्य अशा विविध रांगोळ्यांना भेट देत अमृता यांनी स्पर्धकांचे कौतुक केले; तसेच स्वतः रांगोळीही काढली. सीएम चषकाच्यानिमित्ताने अनेक युवा खेळाडूंना आणि मुख्यत्वे तरुणी आणि गृहिणींना हक्काचे क्रीडा-कला व्यासपीठ उपलब्ध झाले आहे. अनेक खेळाडू या स्पर्धेशी जोडले गेल्याचे चित्र महाराष्ट्रासाठी आशादायी असल्याचे अमृता यांनी या वेळी सांगितले.
‘अमृता फडणवीस या स्वतः राज्यस्तरीय टेनिसपटू राहिल्या असून, त्यांच्या उपस्थितीने सीएम चषकमधील सहभागी महिलांचा आत्मविश्वास आणखी दुणावला आहे,’ असे भाजपचे आमदार मंगलप्रभात लोढा म्हणाले.
महाराष्ट्रभरातून सीएम चषकला उदंड प्रतिसाद मिळत असून, आतापर्यंत एकूण ३५ लाखांहून अधिक खेळाडूंनी यात सहभाग घेतला आहे. महिलाही यात मागे नसून आतापर्यंत पाच लाखांहून जास्त महिलांनी विविध स्पर्धेत सहभाग नोंदविला आहे. १२ जानेवारी २०१९ रोजी मुंबईत भव्य कार्यक्रमरूपाने या स्पर्धेची समाप्ती होणार आहे.